MANILA, Philippines - Pinaiimbestigahan ni Senator Francis “Kiko” Pangilinan ang paglala ng prostitusyon partikular sa Legazpi City kung saan isinasagawa ang Balikatan exercises.
Ikinabahala ni Pangilinan ang sumbong sa kanya ng ilang “concerned” na mamamayan ng lalawigan na tumaas ang insidente ng prostitusyon sa Legazpi City simula nang dumating ang mga tropang Amerikano.
Ayon umano sa ilang mapagkakatiwalaang source, halos gabi-gabi ay dalawang batch ng mga kababaihan na umaabot sa 8-10 ang inihahatid sa kampo ng mga sundalong Kano.
“Basta may dalang sampung mga babae ang mga bugaw, ubos lahat. Tapos magdadala ulit ng isang batch ng sampu, kuha rin kaagad lahat yun,” sabi ng source.
Malimit din umanong makita ang mga US servicemen sa mga hotel at bars kasama ang ilang kabataang babae.
Ayon kay Pangilinan, dapat imbestigahan ang nasabing insidente dahil maliwanag na ginagawang ‘bahay aliwan’ ng mga US servicemen ang Pilipinas. (Malou Escudero)