Suporta sa 'di dokumentadong OFWs giit ni Sen. Villar

MANILA, Philippines - Sinalubong kahapon ni Senador Manny Villar ang 31 nagipit na overseas Filipino workers na umuwi sa Maynila buhat sa Riyadh.

Kasabay nito, iginiit ni Villar ang pagbibigay ng agad na suporta sa mga hindi dokumentadong OFW sa gitna ngayon ng krisis pampananalapi.

Tinukoy ni Villar na ang may P250 milyong pondo na Filipino Expatriate Livelihood Support Fund (FELSF) na nilikha para sa mga OFW na apektado ng pandaigdigang krisis ay nakalaan lamang sa mga dokumentadong mangga­gawa.

Dahil dito, nanawa­gan ang dating pangulo ng Senado sa pamahalaan na maglaan ng pondo na tulad ng FELSF kung saan ma­aring makautang ang mga napapauwi na hindi doku­mentadong mang­gagawa upang ma­kapag-umpisa sila ng sa­riling negosyo o kaya ay magkaroon sila ng mga pagsasanay.

Ang 31 minaltratong OFW na nakauwi, sa tulong ng OFW Helpline 0917­ 4226800 ni Villar na nag­bayad ng kanilang pama­sahe at mga multa, ay ma­ngangailangan ng tulong-pangkabuhayan kapag umuwi sila sa kanilang probinsya.

Kabilang sa 31 OFWs si Gloria delos Santos, asawa ni Roger Gemina, ang waiter na lakas-loob na humingi ng tulong kay Villar sa gitna ng selebrasyon sa Manila Polo Club, para ma­kauwi ang asawang nagka­sakit sa pagtatrabaho sa Riyadh, Saudi Arabia. (Butch Quejada)