Binalaan kahapon ni Senador Ramon “Bong” Revilla Jr. ang mga tiwali o manlolokong pulis na meron silang paglalagyan o makakatikim ng kastigo sa ilalim ng repormang ipinatutu pad ni Philippine National Police Chief Director General Jesus Verzosa.
“Kaya yung mga loko dyan (tiwaling pulis), anak ng teteng kayo!” ani Revilla sa kaniyang talumpati bilang panauhing pandangal sa flag raising ceremony ng PNP sa Camp Crame kahapon.
Ang mga salitang ‘Anak ng Teteng’ ang pinasikat ni Revilla sa isa sa kanyang mga pelikula noong araw.
Sinabi ni Revilla na kilala niya si Verzosa sa pagpapairal ng disiplina at magandang ‘track record’ kaya hindi ito papayag na mabahiran ng dungis ang PNP.
Aniya, siguradong may paglalagyan at kakalusin ni Verzosa ang mga pulis na nagsisilbing batik sa magandang imahe ng PNP tulad ng mga nasasangkot sa pangingikil. (Joy Cantos)