Customs bibigyan ng P100 budget

Sa gitna nang napipin­tong imbestigasyon ng Senado sa Bureau of Customs (BoC) dahil sa pag­pasok sa bansa ng mga gatas mula sa China na kontaminado ng me­lamine, inirekomenda ni Sen. Mi­riam Defensor-Santiago ang pagbibigay sa ahen­siya ng P100 na budget.

Ayon kay Santiago, kung P100 lamang ang taunang badyet ng BoC ay posibleng tuluyan nang mabuwag ang ahen­siya dahil wala silang perang magagamit sa kanilang operasyon.Tama lamang aniyang mabuwag na ang ahensiya kung hindi rin lamang nito kayang gam­panan ang trabaho na mapigil ang pagpasok sa bansa ng mga produktong nakalalason.

Dahil nakapasok ani­ya sa bansa ang mga gatas na kontaminado ng melamine, nalagay din sa panganib ang buhay lalo na ng mga sanggol na nakainom nito.

Kabilang sa mga nais mabuwag ni Santiago ang mga tanggapan ng Deputy Commissioner for Enforcement, chief of the Intelligence and Investigation Services at chief of the National Customs Police na mga wala uma­nong na­gawa kaya dapat nang tanggalin. 

Kalimitan na aniyang binibigyan lamang ng Kongreso na P1budget ang ahensya na pamaha­laan na nais ng mabuwag pero sa pagbaba na rin ng halaga ng piso ay gaga­win niya itong P100. Ma­tatan­daan na hiniling ni Santiago sa kanyang Senate Resolution 694 na tukuyin at parusahan ang mga tauhan ng BoC na may kinalaman sa pag­pasok ng produk­tong may melamine sa bansa

Ibinase ni Santiago ang kan­yang resolusyon sa paha­yag ng Department of Health (DoH) na sigura­dong ipinuslit la­mang ang mga ga­tas na kontaminado ng mela­mine dahil walang ta­tak na English sa mga kar­ga­mento nito. (Malou Escudero)