Inaprubahan ng House Committee on Justice ang isang resolusyon na nakikiisa sa Proclamation 1377 na ginawa ni Pangulong Arroyo para bigyan ng amnestiya ang mga rebeldeng komunista.
Ang House Resolution 9 na ini-akda nina dating House Speaker Jose de Venecia, House Minority Leader Ronaldo Zamora at House Majority Leader Arthur Defensor ay pag-uusapan sa plenaryo para aprobahan ito bago dalhin sa Senado para sang-ayunan.
Ayon kay Rep. Matias Defensor, inaprubahan nila ang resolusyon dahil ito ay hinihintay na sa Legislative Executive Development Advisory Council (LEDAC) dahil matagal na itong nakabinbin.
Ang pagbibigay ng amnestiya sa mga rebeldeng komunista ay isang prayoridad sa ginawang pulong sa LEDAC. Ang nasabing proclamasyon ay inisyu ni Arroyo noon pang isang taon.
Ang resolusyon ay naaprobahan kahit na ayaw nina Bayan Muna Reps. Satur Ocampo at Teddy Casino, at Tawi-Tawi Rep. Nur Jaafar dahil pinagdududahan nila ang gobyerno sa pagbibigay ng amnestiya sa mga rebeldeng komunista na walang kahihinatnan. (Buth M. Quejada)