Media nagpasaklolo sa SC

Nagpasaklolo kaha­pon sa Korte Suprema ang ilang mamama­hayag ng ABS-CBN upang ideklarang illegal ang pagkaaresto sa kanila habang nasa kalagitnaan ng coverage sa Manila Peninsula siege noong Nob­yembre ng nakaraang taon at upang hindi na maulit ang pag-aresto sa kanila sakaling mang­yari ulit ang gani­tong insidente sa hina­harap.

Base sa 35 pahi­nang writ of amparo and writ of prohibition, hiniling  ng ABS-CBN reporter na sina Ces Oreña-Drilon at Noel Alamar na big­yan sila ng proteksyon ng Supreme Court upang mapigilan ang gob­yerno na muli pang maulit ang nasabing insidente sa mga susu­nod na panahon.

Iginiit ng petitioners na ang kanilang pag­kaaresto noong Nob­yembre 29 ay hindi la­mang paglabag sa ka­nilang karapatan at kalayaan kundi maging ng kanilang seguridad at kalayaan sa pama­mahayag at makapag­bigay ng impormas­yon sa publiko.

Kabilang naman sa mga respondents sa nasabing petition sina Department of Interior and Local Government Secretary Ronaldo Puno, Justice Secretary Raul Gonzalez, Philippine National Police Chief Director General Avelino Razon, PNP-National Capital Regional Chief Geary Barias, Police Chief Supt. Asher Dolina at ilang John Does.

Hinihikayat din ng mga petitioner ang Korte Suprema na mag isyu ng permanent protection na nag aatas sa mga nabanggit na opis­yal na huwag silang kasuhan at huwag ipa­ tupad ang warrantless arrests.

Nilinaw pa ng mga petitioners na illegal ang pag-aresto sa ka­nila dahilan sa wala namang basihan para sa warrantless arrests at wala naman silang nagawa o nagtang­kang gawin sa harapan ng isang arresting officer.

Handa naman ang PNP na harapin ang ‘writ of amparo‘ petition.

Sinabi ni PNP Chief Director Gen­eral Ave­lino Razon Jr., nireres­peto nila ang hakbang ng isang grupo ng media sa pag­sasampa ng  nasabing ‘writ of am­paro’ dahil karapatan nila ito.

Nabatid na naghain ng 35 pahinang petis­yon para sa ‘writ of amparo’ ang grupo nina Drilon at Malaya columnist Ellen Torde­sillas.

Gayunman, sinabi ni Razon na dapat mag­­ sitigil na sa kata­talak o pagbibigay ng negati­bong reaksyon sina Drilon at Tor­de­sillas dahilan walang tinutu­koy ang PNP na isa sa kanilang dalawa ang sabit sa pagpa­patakas sa puganteng si Marine Captain Ni­canor Fael­don sa ka­initan ng Manila Peninsula siege.

“Hindi na kaila­ngang mag-deny ni Ellen o Ces dahil alam nila  sa kaibuturan ng kanilang puso na hindi sila yun,” pahayag ni Razon sa press briefing sa Camp Crame.