Namatay ang apat na miyembro ng isang pamilyang Pinoy sa isang sunog na tumupok sa kanilang tahanan sa New Jersey, USA noong Disyembre 12.
Sa ulat na nakarating kahapon sa tanggapan ng Department of Foreign Affairs (DFA), ang mga biktima ay nakilalang sina Edgardo Aguas, 57; asawang si Digna, 47; anak nilang si Emily, 13; at lola nito na si Flotilda Fullao, 86.
Nakaligtas naman ang ikalimang miyembro ng pamilya Aguas na nakilalang si EJ matapos na tumalon sa bintana ng unang palapag ng tahanan na matatagpuan sa Union, New Jersey.
Si Aguas ay kasalukuyan umanong nananatili sa kanilang mga kamag-anakan sa Bergen County.
Ayon sa mga awtoridad, ang sunog ay nagsimula umaga ng Disyembre 12. Mabilis umanong kumalat ang apoy sa buong kabahayan. Bagamat nakalabas pa ng tahanan si Edgardo ay nag-collapse din ito pagdating sa labas dahil sa labis na suffocation na naranasan at malaunan ay binawian din ng buhay.
Ang tatlo pang biktima na pawang natutulog umano sa ikalawang palapag ay nakulong at hindi na nakalabas pa.
Inaalam pa ng arson investigators ang tunay na pinagmulan ng sunog na hinihinalang mula sa nag-short circuit na kuryente sa basement ng tahanan. (Mer Layson)