Bedol tinutugis na

Hiniling kahapon ni Autonomous Region in Muslim Mindanao Regional Director Chief Supt. Joel Goltiao na mag­ lunsad na ng “nationwide manhunt” ang pulisya upang madakip ang kontrobersyal na si dating Maguindanao election supervisor Lin­tang Bedol.

Sa panayam sa radyo, sinabi ni Goltiao na hiniling niya sa ibang regional offices ng Philippine National Police at iba pang “law enforcement agency” tu­lad ng National Bureau of Investigation na ha­napin na rin si Bedol.

Sinabi ni Goltiao na naniniwala sila na naka­labas na ng ARMM si Bedol ngunit nasa loob pa rin ng bansa.

Matatandaan na bi­nigyan ng Commission on Elections ng 24 na oras na deadline si Gol­tiao upang arestuhin si Bedol.  Ihahain sana ng Criminal Investigation and Detection Group ang arrest warrant la­ban kay Bedol ngunit nabigo nang hindi na ito abutan sa kanyang ba­hay sa Cotabato nitong naka­raang linggo.

Nabatid naman sa mga kamag-anak ni Be­dol na noon pang Oktu­bre 19 huling nakita si Be­dol sa kanyang ba­hay. Isang grupo umano ng mga armadong lalaki ang kumuha kay Bedol hanggang sa hindi na ito makita.

Matatandaan na na­sangkot si Bedol sa si­nasabing mga anomal­ya o dayaan sa naka­raang senatorial elections sa Mindanao sanhi upang ipadakip ito ng Comelec.

Inakasuhan kaha­ pon ni Senate Minority Lead­er Aquilino Pi­mentel Jr. na binibig­yang protek­syon uma­no ng Arroyo government  si Bedol kaya hindi ito maaresto ng pulisya.

Ayon kay Pimentel, bigo ang PNP na ma­aresto si Bedol sa kabila ng ipinalabas na warrant of arrest ng Comelec dahil sa may­roon itong proteksyon ng powerful political forces.

Aniya, matapos iba­sura ng Comelec ang apela ni Bedol at mag­palabas ng arrest warrant sa nasabing election supervisor nitong Oktu­bre 23 ay hindi na maha­gilap ng pulisya si Bedol.

Napatunayan ng Comelec na lumabag si Bedol sa indirect contempt at hinatulang ma­kulong ng 6 na buwan.

Malaki ang hinala ni Pimentel na mayroong kinalaman si Pangu­long Arroyo sa biglang pag­kawala ni Bedol.

Hinamon ng mam­ba­batas ang Comelec at PNP na gawin ang lahat ng pamamaraan upang mahanap at maaresto si Bedol.

Inakusahan ni Pi­men­tel na may kinala­man si Bedol sa fabrication ng CoC’s at iba pang election document sa Maguindanao na nagbigay daan upang magwagi si Sen. Juan Miguel Zubiri ng Team Unity at mala­mangan nito si United Opposition candidate Koko Pimen­tel sa naka­raang 2007 senatorial elections.

Inihayag ni Atty. Andrei Bon Tagum na nasa Maguindanao pa rin ang kanyang kli­yente na si Bedol.

Ang pahayag ay gi­nawa ni Tagum kaug­nay nang balitang na­taka­san ni Bedol ang mga pulis.

Sa isang panayam sa telebisyon (ANC), sinabi ni Tagum na nang huli silang mag-usap ni Bedol sa tele­pono noong Biyernes, sinabi umano nito na siya ay nasa Maguin­danao.

Kumbinsido naman si Tagum na hindi nag­sisinungaling ang kani­yang kliyente at ito ay nasa Maguindanao pa rin hanggang sa kasalu­kuyan.

Sinabi rin sa kaniya ni Bedol na na­nga­nganib ang buhay ba­gamat hindi naman umano nito sinabi kung sino ang mga nagta­tangka o nagbabanta sa kaniya. (Danilo Garcia, Rudy Andal at Mer Layson)