3 heneral pinagpipilian para Air Force chief

Tatlong heneral ang mahigpit na naglalaban ngayon para sa susunod na iluluklok bilang Philippine Air Force (PAF) chief kapalit sa pagreretiro ng kasalukuyang hepe na si Lt. Gen. Jose Reyes sa darating na Pebrero 3 ng taong kasalukuyan.

Ayon sa nakalap na impormasyon, mahigpit na pinagpipilian sa kasalukuyan sina Major Gen. Horacio Tolentino, commander ng Tactical Operations Command na mula sa Class ’74 ng Philippine Military Academy (PMA) ; Pedrito Cadungog, PAF staff ng PMA Class ’75 at Major Gen. Fernando Manalo, Commander ng Air Logistic Service Command na na-commissioned ng PAF noong 1975.

Maliban sa mga nabanggit ay kasama rin sa mga napipisil si Major Gen. Enrique "Ike" Insierto, commander ng Air Education Command na nakabase sa San Fernando Air Base at mistah rin ni AFP chief of staff Gen. Hermogenes Esperon Jr., ng PMA Class ’74.

Napag-alaman na nakatakdang mag-retiro si si Reyes ngayong darating na Pebrero 3 sa pagsapit ng kanyang ika-56 kaarawan na siyang mandatory sa age retirement ng bawat miyembro ng AFP.

Si Manalo umano ang pinapaboran ni Reyes na humalili sa kanyang pwesto, ayon pa sa nakalap na impormasyon.

Inaasahan na sa susunod na mga araw ay ihahayag na ni Pangulong Gloria Macapagal-Arroyo ang susunod na PAF chief base na rin sa rekomendasyon ng AFP Board of Generals. (Joy Cantos)