Iggy umalma kay Cayetano

Hinamon kahapon ni Negros Occidental Rep. Ignacio "Iggy" Arroyo si Taguig-Pateros Rep. Alan Peter Cayetano na maglabas ng ebidensiya sa paratang ng huli na siya at ang kanyang pamangking si Pampanga Rep. Mikey Arroyo ay tumatanggap ng jueteng payola kaya dapat silang matanggal sa House of Representatives.

Sinabi ni Arroyo na ang pag-abuso ni Cayetano sa kanyang katayuan, makapagsinugaling lamang ay dapat nang mahinto bago isipin ng publiko na lahat ng kogresista ay katulad ni Cayetano.

"Una ay ang diumano’y dollar account sa Germany ng isa sa amin, na hanggang ngayon ay walang maipakitang katibayan si Mr. Cayetano."

"Ngayon naman ay nananawagan siya sa pagpapatanggal sa akin at sa aking pamangkin sa Kongreso dahil umano sa pagtanggap namin sa jueteng payola gayong wala siyang maipakitang katibayan maliban sa kanyang mapanlinlang na mga salita," ayon pa kay Arroyo.

Binigyang-diin ni Arroyo na dapat maglabas agad ng ebidensiya si Cayetano kung hindi ito namumulitika at naninira lamang ng reputasyon. (Malou Escudero)