Sinabi ni Bayan Muna Rep. Joel Virador na dapat nang isantabi ng Malacañang at ng Kongreso ang Con-Ass at pagtuunan ng pansin ang mga ordinaryong manggagawa.
Naniniwala si Virador na mas magkakaroon ng tiyansa sa 2007 elections ang mga mambabatas na susuporta sa pagpasa ng panukalang P125-wage hike kaysa sa Con-Ass.
"The Supreme Court has twice rejected the Malacañang-directed People’s Initiative petition. The so-called Plan B for Charter change must be abandoned completely for Congress to concentrate on passing long-pending bills that will benefit the impoverished people," ani Virador.
Naniniwala rin si Virador na mas makakatulong sa mga mamamayan ang P125 wage hike kaysa sa isinusulong na Charter change o pag-amiyenda sa Konstitusyon.
Ipinaalaala nito na ilang beses nang nangako ang liderato ng Kongreso na aaksiyunan ang panukala pero hanggang ngayon ay nakabinbin pa rin ito at hindi umuusad.
"Instead of changing the 1987 Constitution, Congress should better pass the P125 Across-the-Board Wage Increase and attend to the hundreds of other bills and resolutions pending at various committees," pahayag ni Virador.
Sinigurado rin nito na susuportahan ng mga manggagawa sa 2007 elections ang mga kongresista na magsusulong ng panukala kaugnay sa pagtaas ng sahod. (Malou Escudero)