Anti-Billboard Act pasado na

Inaprubahan kagabi ng Senado ang Anti-Billboard Blight Act ni Sen. Miriam Defensor-Santiago para sa pagbabawal na magtayo ng mga billboards sa mga lansangan na magiging banta sa buhay ng mga motorista at mamamayan.

Sa botong 13-0, ipinasa sa ikalawa at pangatlo pagbasa ang Committee Report No. 110 matapos sertipikahan ni Pangulong Arroyo na urgent ang kanyang panukala. Si Santiago ang chairman ng public works committee-subcommittee on billboard.

Mahigpit na ipinagbabawal na ngayon ang paglalagay ng billboard sa mga highway kung saan ay makakasira o mahaharangan ang view o pedestrian traffic, paglalagay ng billboard sa mga residential areas, pagtatayo ng billboard sa mga lupang pag-aari ng gobyerno sa mga highways at kalye, pagkakabit ng billboard sa mga poste at sa ibabaw ng mga gusali.

Bukod sa multa, makukulong ang mga may-ari ng billboards pati mga opisyal ng lokal na pamahalaan na pumayag na magtayo ng billboards. (Rudy Andal)