Overstaying sa Bonifacio hanggang Miyerkules na lang

Hanggang Miyerkules na lamang ang may 115 overstaying enlisted personnel sa Married Enlisted Quarters (MEQ) sa Bonifacio Naval Station dahil puwersahan na silang palalayasin kapag nagmatigas pang manatili sa kanilang quarters.

Sa isang resolusyon na nilagdaan noong Mayo 24, 2006, sinabi ni Navy Vice Commander and concurrent Chair ng Navy Housing Board Rear Admiral Abraham Abesamis na ang mga unauthorized personnel sa nabanggit na quarters ay binigyan ng pitong araw upang mag-impake at lisanin ang lugar upang tirahan naman ito ng mga enlisted personnel na nasa aktibong serbisyo at upang mapakinabangan naman ng kanilang mga pamilya. Ang mga awardees ng military quarters ay lumagda ng isang kontrata na kanilang lilisanin ang lugar matapos ang kanilang retirement, separation, discharge mula sa serbisyo at puwersahang paaalisin dito kapag sila ay lumabag sa kontrata. (Angie dela Cruz)