House arrest ni Nur, ayos lang sa DOJ

Hindi na kokontrahin pa ng Department of Justice (DOJ) ang desisyon ng Makati Regional Trial Court na isailalim sa house arrest si dating ARMM Gov. Nur Misuari habang nagpapagamot.

Ayon kay Justice Sec. Raul Gonzalez, ang pagpayag ni Makati RTC Branch 138 Judge Sixto Marella Jr. na makapanatili sa kanyang bahay sa New Manila sa Quezon City si Misuari at kapwa nito akusado sa kasong rebelyong si Ustadz Abuharis Usman ay bahagi ng karapatan ng isang maysakit na bilanggo.

Sinabi ni Gonzalez na kung talagang hindi na kaya ng dalawang akusado ang malaking gastusin sa pananatili ng matagal sa St. Luke’s Hospital ay mas makabubuting manatili sa New Manila na malapit sa naturang ospital kaysa magpabalik-balik sa Fort Sto. Domingo sa Laguna kung saan nakadetine ang dalawa.

Si Misuari at Usman ay pinayagan ng korte na manatili sa #27, 6th St., New Manila, QC.

Sumasailalim ang dalawa sa medical treatment sa St. Luke’s dahil si Misuari ay mayroong hypertension at diabetic naman si Usman.

Ang dalawa ay kapwa akusado sa kasong rebelyon na may kaugnayan sa 2001 Jolo bombing. (Grace dela Cruz)