‘Impeach Abalos’ ipinoporma na sa Kamara

Binabalak ng opposition bloc sa Mababang Kapulungan ng Kongreso ang paggamit kay Comelec Commissioner Ressureccion Borra bilang state witness sa impeachment complaint na ihahain nila laban kay Comelec chairman Benjamin Abalos Sr.

Sinabi ni Akbayan partylist Rep. Loretta Rosales na ang pahayag ni Borra sa ginawang hearing sa Senado na nagkaroon ng dayaan noong 2004 elections ay maaaring gamitin para mapatalsik si Abalos.

"He can redeem the Comelec, we can use his testimony and he could be a direct witness to a possible impeachment complaint against chairman Abalos," ani Rosales.

Ayon naman kay Akbayan Rep. Risa Hontiveros-Baraquel, maaari ring lumutang ang iba pang opisyal ng Comelec at ibunyag ang kanilang nalalaman tungkol sa dayaan noong 2004 elections.

Pero sinabi ni House Minority leader Francis Escudero na mas makakabuti kung mag-resign na lamang sa kanyang posisyon si Abalos.

"Sana ay huwag na nilang pilitin na tahakin pa ang mapait na karanasan ng impeachment. Sana ay maliwanagan sila sa mga sinasabi ni Commissioner Borra at magbitiw na sila," ani Escudero.

Sinigurado ni Escudero na hindi sila magpapatawag ng hiwalay na imbestigasyon kaugnay sa rebelasyon ni Borra.

"Ayon kay Commissioner Borra, nagkaroon ng dayaan. Kung ganoon, ano ang kanilang ginawa para pigilan ito, at ano ang ginawa nila para usigin at papanagutin ang mga nandaya," pahayag ni Escudero.

Gayunman, nilinaw ni Borra na dayaan sa Lanao del Sur ang tinutukoy niyang dayaan at hindi ang buong halalan. (Malou Escudero)