Gringo ‘di susuko!

Walang planong magpahuli o sumuko sa mga awtoridad si dating Sen. Gregorio "Gringo Honasan.

Ito ang sinabi ng kanyang spokesman na si ret. Col. Edgardo Macahiya ng Philippine Guardians Brotherhood Inc. (PGBI) kasunod ng warrant of arrest na ipinalabas ng Makati Regional Trial Court para sa kasong kudeta. Ayon kay Macahiya, kuwestiyunable umano ang warrant of arrest na ipinalabas laban kay Honasan dahil wala itong kasalanan.

Si Honasan ay kabilang sa 51 personalidad na kinasuhan ng kudeta, inciting to sedition at rebelyon ng PNP-CIDG alinsunod sa Proclamation 1017.

Kamakalawa ay inutos na arestuhin siya kaugnay sa pagkakasangkot sa bigong Oakwood mutiny noong 2003 at bigong kudeta nitong Pebrero 24.

Kahapon ay isinailalim na sa watchlist ng Bureau of Immigration (BI) si Honasan kasama ang anim na partylist representatives na sina Bayan Muna Reps. Satur Ocampo at Teddy Casiño, Gabriela Rep. Liza Maza, Anakpawis Reps. Crispin Beltran, Rafael Mariano at Joel Virador upang hindi makatakas at makalabas ng bansa ang mga ito. Nasa hold departure order din sina ret. Col. Jake Malajacan, ret. Capt. Felix Turingan, 1st Lt. Lawrence San Juan, 2nd Lt. Aldrin Baldonado at 37 iba pa. (Joy Cantos/Grace dela Cruz)