Customs collector pinasu-suspinde sa katiwalian

Pinasasailalim sa suspension sa Office of the Ombudsman ang isang deputy collector ng Bureau of Customs (BOC) upang hindi umano nito maimpluwensiyahan ang kasong katiwalian na isinampa laban dito sa mababang hukuman. Sa ipinadalang liham sa tanggapan ng Ombudsman ni Atty. Zaldy Quimpo, abogado ng mga complainant na sina Henry Limon at Cecil Quimpo, dapat lamang na pansamantalang masuspinde sa kanyang posisyon si Deputy Collector for Assessment Gracia Caringal, habang nakabinbin pa ang kasong paglabag sa RA 3019 o mas kilala bilang Anti-Graft and Corrupt Practices Act laban dito sa Manila Regional Trial Court. Hiningian umano ni Caringal ng regalo at pera sina Limon at Quimpo kapalit ng pag-release ng kanilang mga textile products. Bukod dito, nadiskubre rin ang tatlong palapag na gusali nito sa Rosario, Batangas na nagkakahalaga ng P25-M; resthouse sa Ayala na P5-M at residential house sa Ayala na aabot sa P30-M gayong ang buwanang sahod nito sa gobyerno ay P25,000 lamang. (G.dela Cruz)