Tricycle, pedicab drivers binalaan ni Recom sa pasahe

Binalaan kahapon ni Caloocan City Mayor Enrico "Recom" Echiverri ang mga tricycle at pedicab drivers at operators na magtataas ng kanilang pasahe dahil wala itong awtorisasyon ng pamahalaang-lungsod. Sinabi ni Echiverri na hindi tamang samantalahin ng ilang mga driver ang kaguluhang nagaganap at ang patuloy na pagtaas ng presyo ng gasolina. Ito ay makaraang makatanggap ng reklamo ang alkalde hinggil sa ilang tricycle driver na nagtaas na ng kanilang pasahe. Ipinaliwanag nito na ang mga magtataas ng kanilang pasahe ay lalabag sa batas at ordinansang ipinaiiral sa lungsod.

Kung nais anya ng mga drivers at operators na magtaas ng pasahe ay nararapat na makipag-ugnayan sila sa Tricycle and Pedicab Regulatory Services sa city hall. Dapat anyang isaalang-alang ang kapakanan ng mga sumasakay dahil hindi naman tumataas ang suweldo ng mga ito.