Aktibong opisyal ng AFP bawal makipag-usap sa retired generals

Pinagbabawalan umano ng liderato ng Armed Forces of the Philippines (AFP) ang mga aktibo nitong opisyal na makipag-usap sa mga retiradong heneral na nasa likod ng destabilisasyon laban sa pamahalaan.

Ayon sa ilang mga division, brigade at battalion commanders, ang direktiba ay ipinalabas ni AFP Chief of Staff Gen. Generoso Senga. Natatakot umano ang AFP ba mabuyo ang mga commanders na sumama sa pag-aaklas sa gitna na rin ng umiinit na namang isyu ng kudeta. Pinaalalahanan ni Senga ang mga aktibong opisyal na manatiling tapat sa Chain of Command at Konstitusyon ng bansa.

Kabilang sa mga retired generals na kilalang kontra sa gobyerno sina ex-Defense Sec. Fortunato Abat, ex-Phil. Constabulary-Integrated National Police (PC-INP) Commander ret. Gen. Ramon Montaño, ret. Navy Commodore Rex Robles at ex-AFP Chief of Staff ret. Gen. Joselin Nazareno. (Joy Cantos)