'Bata' ni Lacson, timbog sa US

Nasakote ng United States-Federal Bureau of Investigation (FBI) ang isa sa mapagkakatiwalaang tauhan ni Senador Panfilo Lacson na si P/Supt. Michael Ray Aquino na dawit sa Kuratong-Baleleng case sa isang simpleng paglabag sa immigration law sa New York.

Inihayag ni National Bureau of Investigation-Interpol chief Atty. Ric Diaz na nadakip si Aquino kamakalawa matapos na hanapan siya ng mga papeles sa pananatili sa Estados Unidos ngunit ang palsong "tourist visa" na hawak nito ang naipakita sa mga atworidad.

Wala pang opisyal na dokumento buhat sa FBI na hinahawakan ang NBI ngunit sinabi ni Diaz na sa kanila ipapasa ang kustodya ng nahuling opisyal. Ito’y kapag natapos na umano ang paglilitis sa kaso hinggil sa paglabag sa immigration law ni Aquino.

Si Aquino kasama si dating P/Sr. Supt. Cesar Mancao ng binuwag na Presidential Anti-Organized Crime Task Force (PAOCTF) na pinamumunuan noon ni Lacson ay isinasangkot sa kasong multiple murder kaugnay sa umano’y pagpatay sa mga miyembro ng Kuratong Baleleng robbery/holdup gang noong l995.

Nahaharap rin si Aquino sa kasong abduction with murder kaugnay naman sa kontrobersyal na Dacer-Corbito double murder case.

Sina Aquino at Mancao ay tumakas sa bansa patungong US matapos ang sunud-sunod na pagsasampa ng kaso laban sa mga ito. (Ulat ni Danilo Garcia)