Desisyon ng Japan sa bagong immigration policy nakabitin

Sa Marso pa malalaman kung papayag ang Japanese government sa kahilingan ng Pilipinas na limang taong moratorium para sa pagpapatupad ng mabigat na immigration policy.

Sinabi ni Zamboanga Rep. Roselle Barinaga, chair ng house committee on labor, sa susunod na buwan pa malalaman kung ano ang magiging desisyon ng Japan kaugnay sa gagawing paghihigpit sa visa policy sa ating mga Overseas Performing Artists (OPA’s).

Umapela sina Rep. Barinaga at Albay Rep. Edcel Lagman sa Japanese Congress at Ministry of Justice na bigyan ng sapat na panahon ang Pilipinas para makaabot sa kanilang deadline.

Libo-libong OPA’s at OFW’s ang maaapektuhan ng panibagong visa policy ng Japan sa sandaling ipatupad na ito.

Wika pa ni Barinaga, nakatakdang mag-usap muli sa Marso ang Japanese government at iba pang kongresista kaugnay sa ipapalabas na pinal na desisyon tungkol sa ipapatupad na bagong immigration laws ng Japan. (Ulat ni Malou Rongalerios)