Mga Pinoy sa Amerika pinag-iingat

Pinayuhan ng pamahalaan ang lahat na Pilipinong nasa ibayong dagat na maging maingat sa kanilang paglalakad at paglabas ng tahanan kasunod ng panibagong banta ng terorismo sa Washington at New York.

Ayon kay Presidential Spokesman Ignacio Bunye, ang mga bantang ito ay hindi isinasaisang-tabi lang ng pamahalaan.

Kabilang sa mga lugar na binabantaang atakihin ng mga terorista ay ang New York Stock Exchange and Citigroup Inc., World Bank, International Monetary Fund sa Washington at ang Prudential Financial Inc. sa Newark, New Jersey alinsunod sa impormasyong nakalap ng intelihensiya.

Sinasabi sa intelligence report ng US na ang pag-atake ay gagawin ng Al-Qaeda na siyang may malaking interes sa pananalakay sa mga institusyong pinansiyal.

Samantala, inihayag ni Bunye na nananatiling matatag ang istratehikong relasyon ng Pilipinas at Estados Unidos.

Ayon kay Bunye, nagpapatuloy ang magandang pagkakaibigan ng dalawang bansa bilang isang plataporma ng nagkakaisang paglaban sa terorismo para idepensa ang demokrasya. (Ulat ni Lilia Tolentino)