Angelo palayain - Malaysia

Bagaman mabagal ang desisyon ng Philippine government ukol sa pagbihag sa Filipino worker na si Angelo dela Cruz, nagpakita ng simpatiya ang mataas na opisyal ng Malaysia para sa Overseas Filipino Worker na si Angelo dela Cruz at hiniling sa mga Iraqi rebels na palayain na ito.

Umapela ang Malaysian government sa pamamagitan ni Foreign Minister Syed Hamid Albar sa Islamic Army of Iraq-Khalid Bin al-Waleed Brigade na pakawalan na ng mga ito ang kanilang mga foreign hostages kabilang ang Pinoy truck driver na si dela Cruz.

"We strongly appeal for an immediate and unconditional release of all hostages including a national from the Philippines being held in Iraq," ani Foreign Minister Syed Hamid sa kanyang press statement.

Sinabi ni Syed Hamid, tumatayong chairman ng 57-member ng Oraganization of Islamic Conference na hindi nila pinapayagan ang ganitong gawi na banta sa buhay ng mga inosenteng sibilyan at manggagawa.

Sinabi naman ni National Security Adviser Norberto Gonzales na nakipag-usap na sila sa mga religious leaders ng Indonesia, Malaysia, Libya at Egypt.

Sinabi ni Gonzales na lahat ng kanilang kausap na foreign religious leaders ay maiimpluwensya. Sila aniya ang katuwang din ng gobyerno upang tumulong para sa pakikipagnegosasyon sa nasabing mga hostage takers upang matiyak ang kaligtasan at mapalaya ang nasabing bihag na Pinoy. (Ulat ni Ellen Fernando)