176 Army reservists nag-alburoto dahil hindi binayaran

Umalma kahapon ang may 176 reservists ng Philippine Army mula sa 1st Regional Defense Group na nakabase sa Camp Laberinto, Naguilian, La Union matapos na hindi sila mabayaran sa kanilang "election duties" nitong katatapos na May 10 elections.

Sa reklamong iniharap ni MSgt. Antonio Acuavera, pinuno ng mga reservists sa La Union kay Col. Constantino Pante, Group Commander ng 1st Regional Defense Group, sinabi nito na tapat umano nilang ginampanan ang kanilang tungkulin bilang back-up force ng Philippine National Police (PNP) sa pagpapalaganap ng katahimikan at kaayusan ng eleksiyon subalit pagkatapos ay nauwi lang sa wala dahil hindi nila natanggap ang nararapat na bayad para sa kanilang serbisyo.

Base sa sulat ni Acuavera kay Pante, iginiit nito na aprubado pa mismo ng Commission on Elections (Comelec) ang kanilang deployment kaya marapat lamang silang bayaran.

Anila, dapat silang tumanggap ng tig-P500 kada araw na allowance maliban pa sa P60 meal allowance.

Nabatid na may apat na araw na nagbantay ang mga reservists na nasa ilalim ng kontrol ni P/Chief Insp. Eduardo Abaday sa San Fernando City, bayan ng Bauang, Caba at Aringa simula noong Mayo 9 upang mangalaga ng seguridad doon. (Ulat ni Joy Cantos)