Bro.Eddie lusot sa disqualification

Wala nang hadlang pa ang pagtakbo bilang pangulo sa darating na May elections si Jesus Is Lord (JIL) Bro. Eddie Villanueva matapos na ibasura kahapon ng Comelec ang disqualification case na isinampa ng isang grupo ng mga guro at manggagawa laban dito.

Sa 8-pahinang desisyon ng Comelec 2nd Division, dinismis ang petisyon ng grupong Advocates and Adherents of Social Justice for School Teachers (AASJS) na kinakatawan ni Atty. Samson Alcantara na idiskuwalipika si Bro. Eddie dahil sa "lack of merit."

Sinabi ng AASJS na hindi dapat payagan ang kandidatura ni Bro. Eddie dahil nilalabag umano nito ang Konstitusyon partikular ang batas na tumutukoy sa separasyon ng Simbahan at estado.

Sa desisyon ng Comelec, hindi hadlang ang pagiging religious leader para pumasok sa pulitika.

Iaapela ni Alcantara sa Comelec en banc ang usapin. (Ulat ni Ellen Fernando)