Magulang ni Dalingay nasa HK na

Tumulak na kahapon patungong Hong Kong ang mga magulang ng Pinay domestic helper na namatay sa Severe Acute Respiratory Syndrome (SARS) upang saksihan ang cremation ng kanilang anak.

Ayon kay Overseas Workers Welfare Administration (OWWA) Administrator Virgilio Angelo dakong alas-2:30 ng hapon ng umalis ang mga magulang ni Adela Dalingay, 39, na sina Gregorio at Lolita Dalingay lulan ng PAL flight 306 kasama ang ilang opisyal ng OWWA, DFA at DOLE.

Sinabi ni Angelo na pansamantalang tutuloy ang mga magulang ni Dalingay sa OWWA Hostel sa HK kung saan naroon ang labi.

Pumayag ang mga opisyal ng HK na masilayan sa viewing room ang Pinay domestic helper bago tuluyang sunugin ang labi nito.

Tiniyak din ni Angelo na matatanggap ng pamilya ni Dalingay ang lahat na mga benepisyo na ilalaan ng social benefits division ng kanilang tanggapan dahil legal naman namasukan ang biktima sa HK na tumagal ng 7 taon. (Ulat nina Jhay Mejias/Ellen Fernando)