Mata ni GMA kinagat ng insekto

Nakagat ng insekto (sun flea) ang kanang mata ni Pangulong Arroyo matapos na magtungo ito sa Palawan nitong nakalipas na Sabado’t Linggo para magbakasyon kasama ang kanyang pamilya.

Kaya ng dumalo ito sa paglulunsad ng Sun Cellular, ang bagong mobile telephone company na pag-aari ng pamilya Gokongwei ay naka-shades ang Pangulo.

Sa nasabing launching, binigyang daan ng Pangulo ang pag-uusap ng isang Pinoy nurse sa Kuwait at kanyang pamilya dito.

Tiniyak ni Joel Pacaro, OFW sa Kuwait mula pa 1992 na maayos ang kanilang kalagayan at tahimik naman doon.

Nagpasalamat din ito sa Pangulo sa kanyang pagdalaw sa mga OFW sa Kuwait noong nakaraang buwan. (Ulat ni Ely Saludar)