Impeachment vs GMA di tinanggap ng Kamara

Hindi man lamang naka-first base ang impeachment complaint laban kay Pangulong Gloria Macapagal-Arroyo na inihain kahapon ng Philippine Consultative Assembly (PCA) na pinamumunuan nina dating Senador Juan Ponce Enrile at Francisco Tatad matapos itong tanggihan ng Mababang Kapulungan ng Kongreso.

Hindi tinanggap ni House Secretary General Roberto Nazareno ang impeachment complaint nang dalhin bandang alas-4:30 ng hapon sa Kamara ni Lynda Montayre, Chairman ng PCA at ng iba pa nitong mga kasamahan.

Base sa impeachment rules, kinakailangang may mag-endorsong Kongresista bago tanggapin ng House Sec. Gen ang anumang impeachment complaint.

"The rules are very clear. A complaint for impeahment filed by private complainant can only be entertained if there is a corresponding endorsement from a member or members of the House," ani Nazareno.

Sinabi naman ni Montayre na dapat ay tinanggap ang reklamo alang-alang sa tinatawag na due-process.

Nagtataka si Montayre kung bakit nagmamatigas ang Kongreso sa pagtanggap ng kanilang ihahaing impeachment complaint laban sa Pangulo. (Ulat ni Malou Escudero)