Ayon kay Villarama, naramdaman niya ang pagtitiwala ni GMA higit sa pagtitiwalang ibinibigay nito sa kanyang asawang si Atty. Arroyo noong nagsisilbi itong chief of staff ng Pangulo na noo’y vice-president pa lamang ng bansa.
Subalit sa kabila umano ng ipinakitang pagtitiwala sa kanya ni GMA ay hindi totoong may namagitan sa kanilang dalawa nang higit pa sa "employee-employer relationship."
Inamin ni Villarama na ilang beses na rin silang natsismis ni Pangulong Arroyo subalit wala umano itong katotohanan.
"Siguro mahigit na isang libong beses na akong tinanong kung naging girlfriend ko si Gloria, tinatawanan ko na lang," ani Villarama.
Magugunitang sinabi kamakalawa ni Villarama na napilitan lamang siyang magbitiw bilang chief of staff ni GMA matapos matsismis na nagpapatong siya sa isang kontrata ng Office of the Vice President.
Ani Villarama, noong Hulyo 3, 1999 tinawagan siya ng Pangulo para tanungin ang tungkol sa umano’y nagpatong siya ng 30% komisyon sa mga equipment na bibilhin ng OVP.
Labis umanong nasaktan si Villarama sa nasabing bintang dahil lumalabas anya na pinagdudahan siya nito dahilan para siya magbitiw.
Hininala ni Villarama na siniraan siya kay Arroyo ng mga taong may inggit. (Ulat ni Malou Escudero)