Pagdalo ni Erap sa senate hearing malabo

Inihayag ni Senate President Franklin Drilon na walang kasiguruhan na makakalabas ng kanyang kulungan si dating Pangulong Estrada para dumalo sa isasagawang pagdinig ng senate committee on government corporations and public enterprises kaugnay sa sinasabing $14 milyon na suhol para aprubahan ang IMPSA contract sa rehabilitasyon ng Caliraya-Botocan-Kalayaan hydroelectric plant.

Sinabi ni Drilon,kung sakaling hindi payagan si Estrada ng Sandiganbayan ay maaaring ang mga miyembro na lamang ng komite na pinamumunuan ni Sen. John Osmeña ang magtutungo sa Veterans Memorial Medical Center kung saan nakakulong ang dating Pangulo upang doon na lamang isagawa ang pagdinig.

Magugunita na nagpadala na ng liham ang Senado kay Estrada upang imbitahan ito sa isasagawang hearing sa IMPSA contract habang pinaldahan na rin ng sulat ang Sandiganbayan upang humingi ng pahintulot na payagang makadalo ang dating Pangulo. (Ulat ni Rudy Andal)