Sa isang ambush interview, minaliit ni National Capital Region Police Office (NCRPO) chief, P/Director Edgardo Aglipay ang kakayahan ng mga pro-Erap na maglunsad ng malaking protesta tulad ng nangyari noong Edsa 3 at May 1 Malacañang riot.
Sinabi ni Aglipay na nakausap na niya ang mga opisyal mula sa barangay level at dito’y nakumpirmang mahina na ang suporta sa grupong People’s Movement Against Poverty (PMAP) kaya’t masasabi niyang imahinasyon na lamang ang pag-aalsa ng mga Erap loyalists.
Base sa impormasyon, hindi umano titigil ang PMAP at sila’y kikilos sa Mayo 1 o Labor day kaya’t patuloy na kinakausap ni Aglipay ang liderato nito upang maiwasan ang gulo at mabigyan ng proteksiyon ang mga ralista pati na rin ang publiko. (Ulat ni Joy Cantos)