Pinalawig na termino ni Mendoza hindi iaatras ng Malacañang

Walang plano si Pangulong Arroyo na bawiin ang naging desisyon nito na palawigin pa ng siyam na buwan ang termino ni General Leandro Mendoza bilang hepe ng PNP.

Ayon kay Presidential Spokesman Rigoberto Tiglao, buo ang tiwala ng Pangulo sa liderato ni Mendoza at sa maayos na trabaho ng PNP.

Ito ang reaksiyon ng Palasyo sa pag-angal ng ilang grupo ng Fil-Chinese community sa pangunguna ni Citizens Action Against Crime head Teresita Ang See.

Nadismaya ang grupo ni See dahil sa kabila ng kapalpakan umano sa peace and order ng PNP sa pamumuno ni Mendoza ay nabigyan pa ito ng reward at humaba pa ang panunungkulan.

Si Mendoza ay nakatakdang magretiro sa Marso pero pinalawig pa ng siyam na buwan dahil sa mataas na marka na nakuha sa pinakahuling survey.

Samantala, nilinaw ni Tiglao na hindi masasabing dismayado ang buong Fil-Chinese community kay Mendoza dahil ang grupo ni See ay hindi kumakatawan sa buong Tsinoy sa bansa. (Ulat ni Ely Saludar)