5 board of directors ni Erap sa SMC, pinagbibitiw ng Malacañang

Iginiit kahapon ng Malacañang na dapat nang magbitiw agad sa puwesto ang limang miyembro ng board of directors ng San Miguel Corporation na itinalaga ni dating Pangulong Joseph Estrada upang makapagtalaga ng bagong kapalit si Pangulong Gloria Macapagal - Arroyo.

Ito ay sina Raul de Guzman, bayaw ni Estrada; Allan Lee; Ben Paulino; Esperidion Laxa at Hermogenes Tantoco.

Intensiyon ng Pangulong Arroyo na tanggalin agad sa puwesto ang lima subalit sa desisyong ipinalabas ng Korte Suprema, sinabi nitong puwedeng palitan ang limang hinirang ni Estrada sa susunod pang pulong ng mga SMC Stockholders sa susunod na taon.

Dahil sa pagkabigo ng pamahalaang Arroyo na makapagtalaga ng mga bagong kapalit ng limang miyembro ng SMC board members noong Enero 20 matapos mapatalsik sa puwesto si Estrada.

Ayon naman kay Presidential Spokesman Rigoberto Tiglao na hindi na dapat hintayin ng limang appointees ni Estrada ang susunod pang pulong at kung mayroong "delicadeza" dapat nang magsibitiw ito sa kanilang posisyon. (Ulat ni Lilia Tolentino)