Yasay kinontra ni Demetriou

Pinabulaanan kahapon ni Commission on Elections Chairman Harriet Demetriou ang testimonya ni dating Securities and Exchange Commission Chairman Perfecto Yasay Jr. sa impeachment court kamakalawa na kinumpirma umano niya na sinuspinde ito (Yasay) sa tungkulin para matuloy ang pagbili ng Metro Pacific ng shares sa Philippine Long Distance Telephone Company.

Sinabi ni Demetriou na nais niyang humarap sa impeachment court para kontrahin ang pahayag ni Yasay. Idiniin niya na wala siyang nalalaman sa transaksyon ng Metro Pacific at PLDT at hindi na siya legal counsel ng Pangulo nang mangyari ang sinasabi ni Yasay na nagkita sila sa isang klinika sa Greenhills, San Juan. Iginiit niya na napag-usapan lang nila ni Yasay ang ligalidad ng pagtatalaga ng bagong tagapangulo ng SEC. (Ulat ni Ely Saludar)