Sen. Pimentel, Chief Justice Davide Jr., umangat sa 'Pulse survey

Senate President Aquilino Pimentel at Chief Justice Hilario Davide, Jr. Sila ngayon ang lumilitaw na pangunahing personahe na inaasahan ng mamamayang Pilipino na lulutas sa political at economic crisis na kinakaharap ng bansa.

Ito ang resulta ng isinagawang ekslusibong survey para sa mga pahayagang Philippine Star at Pilipino Star NGAYON ng prestihiyosong Pulse Asia Inc.

Ang survey ay isinagawa noong Nob. 26, 2000 kaugnay ng nalalapit na impeachment trial laban kay Presidente Estrada na pangungunahan nina Pimentel at Davide sa Senado.

Lumilitaw din na bagsak ang trust rating kina Estrada, Vice President Gloria Macapagal Arroyo, ex-presidents Cory Aquino at Fidel Ramos, Manila Archbishop Jaime Cardinal Sin at iba pang political leaders na hinihinalang nasa likod ng mga nangyayaring krisis sa bansa.

Tatlumput anim na porsiyento ng mga taga-Metro ang naghayag ng tiwala kay Pimentel samantalang 21 porsyento ang kay Davide.

Mababa rin ang markang tinamo ni Ilocos Sur Gov. Luis Singson na negative 34 percent.