Dear Tito Miguel,
Ako diay si Ericka, taga Minglanilla, Cebu. Gisapot na gyud ko sa akong higala nga si Kimberly kay kanunay gyud magbitbit og laing mga tawo basta naay okasyon sa amo. Siya ra ang giimbitar, apan magdala og laing mga tawo ug wala pa gyud mi kaila. Dili na maihap ang pagsige nako og badlong niya apan wala gyud mausab. Nagplano ko nga dili nalang nako siya imbitaron kun dunay okasyon sa amoa, apan nahadlok kay basin malain siya nako ba. Imbitado gyud baya ang tibouk nako mga barkada basta dunay espesyal nga okasyon sa amo. Basin maglagot nga siya ra ang wala. Unsaon mani nako Tito Miguel? Dili gyud siya mopatoo bisan unsaon nako og badlong. - Ericka -
* * *
Ericka,
Tinuod, ngil-ad nga batasan natong mga Pilipino ang magbitbit og dili imbitado. Pero bilib ko nimo, ka’y nakaako ka’g badlong sa imong higala. Kasagaran dili na man lang moreklamo. Pero ikaw imo gyud siya nabadlongan.
Ang kapait kay daw wala siya’y nadunggan, magbitbit gihapo’g lain. Mahimo gihapon nimo siya imbitaron, apan depende sa okasyon. Kun anniversary o birthday sa imong ginikanan o igsoon, ayaw pangimbitar, ka’y dili ikaw ang nagselebrar. Wala ka kahibalo,wala sila kauyon sa imong mga higala, labi na gyud niya nga magbitbit og lain, posible pa dili ninyo kaila. Busa dili ka niya mabasol, dili man imong selebrasyon. Ang imong reklamo kaniya, basin mao sa’y reklamo sa imong pamilya kanimo.
Kun imong birthday, kana mahimo nimo siya imbitaron, kun ok ra nimo magbitbit siya’g lain. Pero’g dili gihapon ka makauyon, ayaw imbitara. Kadto lang imong barkada nga dili magdala’g lain. Ka’y unta sa panahon nga ikaw magselebrar, imo kini i-share sa mga tawo nga espesyal kanimo, mga tawo nga parte sa imong kinabuhi.
Ayaw kahadlok nga malain siya. Kun buot hunahunaon, ikaw ang angay malain ka’y magdala siya’g kuyog nga dili imbitado. Siya ang angay maikog, dili ikaw. Kun masakitan siya ka’y mora na ka’g namili sa imong barkada, mao na’y paagi aron makaamgo siya. Total wala man nimo putla inyong panaghigala, naghimo lang ka’g utlanan kun asa ra siya taman. Imo nang katungod, bahala'g mangluod siya. -Tito Miguel-
Magpatambag ka? Ipada kang Tito Miguel: 0991-318-9366