CEBU, Philippines — Gihimakak ni Carlo Aquino ang nigawas nga taho nga matud pa nagsabak ang iyang asawa nga si Charlie Dizon.
“Hindi, hindi. Huwag tayong advance. Nakaka-pressure. Relax lang tayo,” matud pa sa aktor.
Matud pa niya nga maabot ra sila sa maong butang, ug susama sila karon ni Charlie nga busy sa ilang mga career.
Ria nanganak na
Gihimugso na ni Ria Atayde niadtong Lunes ang unang liwat nila sa iyang bana nga si Zanjoe Marudo .
"Eto na! Officially Zaddy ka na, Z," social media post ni Zanjoe.
Kahinumdoman nga nagminyo sila si Zanjoe ug Ria niadtong Marso 2024.
Engaged na si Alyssa
Engaged na ang kanhi "X Factor Philippines" contestant nga si Alyssa Quijano ngadto sa tawo nga espesyal kaayo sa iyang kasingkasing. Sa Instagram, gi-post ni Alyssa ang hulagway nga kuha sa nahitabong proposal ug naka-tag ang iyang hinigugma nga dunay account name nga Daryus Dar.
"The easiest ‘YES’ I’ve ever said! Can’t wait to spend forever with you mahal! I love you!" caption pa ni Alyssa sa maong hulagway.
Gikataw-an lang
Gikataw-an lang ni Andi Eigenmann ang basher nga nitawag kaniya og "dugyot." Imbes nga motubag siya niini, iya ra kining gi-screenshot ug gibutang sa iyang Instagram story inubanan sa nagkatawa nga emoji.
Big projects sa 2025
Naghinam-hinam na ang grupong BGYO sa 2025 gumikan kay nakalinya ang mga dagko nila nga proyekto. Ubay-ubay nga mga awit ang gikatakda nila nga i-release sa maong tuig. Magpadayon usab ang ilang mga konsyerto sa laing nasud. Ang BGYO kay gilangkoban nila ni JL, Mikki, Gelo, Akira ug Nate.
Emosyonal sa advance screening
Emosyonal ang pipila ka miyembro sa BINI nga sila si Colet, Maloi, Mikha, ug Jhoanna pagkahuman og tan-aw sa docuseries nila nga "Chapter 1: Born to Win" atol sa advance screening niini niadtong Lunes. Ang maong docuseries kay naghisgot sa kaagi sa ilang grupo hangtod nga nakab-ot nila ang kalamposan.Nitambong sa maong kalihokan sila si ABS-CBN Chairman Mark Lopez, Head of TV Production and Star Magic head Laurenti Dyogi, Head of Digital Jamie Lopez, Head of Music Roxy Liquigan, ug News head Francis Toral.
Arnel nag-sorry sa publiko
Nangayo og pasaylo sa publiko si Arnel Pineda human nakadawat og mga pagsaway ang iyang performance sa Rio Music Festival nga gipahigayon sa niaging adlaw didto sa Rio de Janeiro, Brazil.
Si Arnel ang lead vocalist sa banda nga Journey ug usa sa iyang giawit sa maong music festival mao ang "Don't Stop Believing."
Nabatyagan sa iyang fans nga naglisod og abot ang singer sa high note sa maong kanta.
Aminado ang singer nga nasakitan siya og maayo sa mga negatibong komento nga iyang nadawat ug naabot sa punto nga nagpatambag siya sa ubang tawo kun angayan pa ba siya nga magpadayon o ba kaha mobiya sa iyang pagka-lead vocalist sa Journey.
“Mentally and emotionally, I’ve suffered already,and im still sufferring..but i’ll be ok,” social media post sa singer.