CEBU, Philippines — Giangkon ni Julie Anne San Jose nga nahisgotan na nila ni Rayver Cruz ang kalabot sa pagpakasal apan nagtoo sila nga maabot ra gyud ang saktong panahon alang niini.
Matud pa niya nga nisulod sila sa kalibotan sa gugma busa ang pagpakasal gyud ang direksyon sa ilang relasyon.
Sa nangaging interview ,gibutyag sa aktor nga si Rayver nga nakita na niya kang Julie Anne nga maoy makauban niya sa pagpaso paingon sa altar sa kaminyoon.
Widows' War gikagat
Sa ikaduhang semana sa ere sa Kapuso series nga Widows' War, nakalangkat na kini og kapin sa 80 million views sa nagkadaiyang digital platforms sa GMA Network.
Pipila sa mga bitoon sa maong teleserye kay sila si Carla Abellana ug Bea Alonzo.
"Maraming maraming salamat, mga Kapuso! Mas intense pa ang mga susunod na ganap, " social media post sa maong network.
Piolo ug Coco mag-uban?
Gidungog nga mag-uban sa usa ka proyekto sila si Coco Martin ug Piolo Pascual. Sukad niulbo ang maong taho, nipadayag sa ilang paghinam-hinam niini ang fans nahisgotan nga mga aktor. Ang Dreamscape Entertainment maoy gikatahong mogama niini.
Magbaha ang mga awit
Human na -release ang iyang debut single nga “Paalam”, target ni Alyssa Muhlach nga masundan kini og daghan pa nga mga awit sulod karong tuiga . Nagtimailhan kini sa iyang pagpaninoud sa pagsulod sa kalibotan sa musika.
Andam sa season 2
Wala ra gyu'y problema sila si Yassi Pressman ug Ruru Madrid kun himoan og season 2 ang naghinapos nila nga teleserye nga Black Rider. Suma pa nila nga komportable ra gyud sila sa usag-usa. Nagkapares na sila kaniadto sa pelikulang Video City.
BINI mo-perform sa Amerika
Malakip ang "Nation's girl group" nga BINI sa special lineup alang sa sikat nga K-pop music festival nga KCON didto sa Amerika. Suma pa sa report, mo-perform ang maong grupo alang sa " M Countdown Pre-show" sa maong kalihokan nga pagahimoon sa Los Angeles, California karong Hulyo 27, 2024.
Makauban nila sa entablado mao ang K-pop stars nga ENHYPEN, NCT 127, NMIXX, TWS, Hyolyn, ug uban pa.