CEBU, Philippines - Aduna ka ba’y karaan nga bag nga ganahan pa nimo nga gamiton, apan magduha-duha ka sa pagamit gumikan kay aduna ka’y masimhutan nga baho sa sigarilyo o bahong karaan?
Pwes, dili na angayan nga maguol gumikan kay akong nakuykuyan sa wikihow.com nga adunay upat ka simple nga pamaagi sa pagpatangtang sa baho sa inyung paboritong bag. Pili lang,asa sa upat ang imong gamitong pamaagi.
UNA : (Gamit ang usa ka umog nga panapton)
• Trapuhan ang tanang parte sa bag aron matangtang ang abog.
• Gamit ang naumog nga panapton, trapuhan pag-usab ang bag.
• Ibuwad kini sa init ug ipabilin kini tibuok adlaw, kun posible.
IKADUHA: (Gamit ang suka ug tubig)
• Magkuha og gamay nga sudlanan aron kabutangan sa isagol nga suka ug tubig.
• Gamit ang naumog nga panapton, ituslob kini sa sinagol nga suka ug tubig.
• Ipahid na kini sa tanang parte sa bag.
• Ibutang ang bag sa gawas aron mabuwad kini sa init.
IKATULO: (Gamit ang liquid dishwashing soap ug tubig)
• Magkuha og gamay nga sudlanan aron kabutangan sa isagol nga tubig ug ang dishwashing soap. Pabuwaon kini.
• Gamit ang sponge, ituslob kini sa sinagol nga tubig ug sabon ug ipahid sa bag.
• Pahangini kini sa landong nga parte sa gawas sa inyong panimalay. Kinahanglan dili kini mainitan.
IKAUPAT: (Gamit ang baking soda ug medyas)
• Ibutang ang baking soda sa usa ka medyas ug ihigot kini.
• Magkuha og dako nga plastic aron isulod ang bag ug ang medyas.
• Ipabilin lang kini sulod sa 24 ka oras. Ang baho sa bag mobalhin kini sa baking soda.
Kun palpak ang unang proseso, mamahimong balikun kini hangtod sa makauyon ka na sa baho sa imong bag. Dili na mamahimong gamiton pag-usab ang ginamit na nga mga materyales aron mas epektibo ug magmalampuson sa imong gibuhat. Puwes, pangitaa na ang mga bag nga wala na ninyo gamita!! (BANAT NEWS)