Dear Banat News Hugyaw,
Salamat kay Lunes napud, suki gyud ko sa Love Story, busa ako napud ang nisuway og padala sa akong story.
Ako diay si Tanly , straight guy, 28 anyos ug taga Lahug, Cebu City, ug angkunon nako nga naka uyab ko og gay sauna.
Dili ko mauwaw sa pagpadala nako og story dinhi sa Banat News Hugyaw, wala man sad nako gisulti ang tinuod nako nga pangalan para lang gyud akong maprotekahan ang tawo nga maoy involve sa akong story.
Dugay nako nga single, ug dili pako andam mosulod pagbalik og relasyon kay busy ko sa akong trabaho ug ako pud ang nagasto sa pagpa-eskwela sa akong mga igsoun maong wala gyud ko’y panahon anang butanga.
Ako lang i-share ang love story na ko last year kung diin nakauyab ko og gay sulod sa unom ka buwan.
Kahibalo ko nga ma-shock ang readers sa akong gisulti, pero akong klaruhon, dili ko maya pero na-inlove lang gyud ko sa usa gay sauna kay tayming kaayo tu nga problemado kay ko niadtong higayona ug siya ang naa sa akong kiliran.
Siya si Alrey, pareha mi og edad ug pereha mi mga agent sa call center. Nagkaila ming duha kay kauban mi sa trabahoan ug pareho pa gyud og floor.
Sauna pa, friendly gyud ko nga pagkatawo, bisan kinsa ang akong ubanan og laag ug dili ko maghunahuna sa istorya sa uban.
Duna lang ko’y problema sauna, wala pa gyud ko ka-move on sa akong ex-girlfriend nga si Dina, apan tungod sa presensya ni Alrey, ako nang napapas sa akong kasing-kasing akong ex-girlfriend. Kung manghagad og laag si Alrey, ako siya nga ubanan ug komportable rapud ko niya kay dili man siya bastos nga pagka-gay. Suod kaayo ming duha, busa dili malikayan nga sungogon mi sa kauban namo sa trabaho, pero baliwala ra gyud ko kay dili man gyyud mi uyab.
Kapila mi nag-inom, pero wala gyud ko kahinumdom nga nagbinastos siya nako, ug dunay mga higayon nga gihatod ko niya sa dihang hubog kay ko.
Kahuman niya og hatud, mouli ra pud siya dayon ug didto nako napruweba ang iyang kaboutan.
Ladlad nga pagkatawo si Alrey, taas siya og buhok, ug pang babaye gyud ang iyang sinultian, busa kung mag-uban mi sa pagpanuroy, masaypan gyud mi og uyab.
Sa kabuotan niya, na-develop bitaw ko og kalit, nakugang ko kung nganong ing-ato man akong feelings kaniya.
Dunay time nga nibakasyon ko Surigao og usa ka semana, siya gyud ang akong mahuna-hunaan ug dali ra ko mingawon niya.
Maulaw ko moangkon niya sa personal kalabot sa akong feelings maong nipadala na lang ko og text-message kaniya.
First time nako nga na-inlove og gay, ug na-shock si Alrey sa akong gi-text ug ni-reply siya nga istoryaan lang namo sa personal inig balik nako sa Cebu.
Pagbalik nako sa Cebu, sa personal ko nanguyab niya, ug iya dayon ko nga gisugot ug nakahilak siya kay wala siya magdahom nga ma-inlove ko og susama kaniya.
Pag-abot og unom ka buwan sa among relasyon, kalit kini nga nagkahanap ug magsige mi og away sa ginagmay nga butang busa napugos gyud mi nga magbuwag ilabi na nga niprangka siya daan nako nga mas maayo nga sayo mi magbuwag kay kahibalo na siya daan nga dili molungtad og dugay ang among relasyon kay maabot ra gyud ang panahon nga mangita ra ko og babaye Nasakitan ko og maayo sa among breakup apan ako na lang gidawat kay nakuha nako iyang punto, kay matawag ra gyud nga temporary ang among relasyon kaniado kay segurado ko nga maabot sa akong huna-huna nga ganahan ko makabaton og kaugalingong pamilya. Mo-request lang ko sa lyrics sa Fall For You Chords by Secondhand Serenade.
Hello Carl! Thank you so much sa imong LOVE STORY! Paabuta ugma puhon ang imong request.
Dear HUGYAWnatics, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate aron matarong og basa.
Mahimo sab nga pinaagi sa snail mail. Ang atong address mao kini:
Love Story
C/o Banat News