CEBU, Philippines — Si Shai Gilgeous-Alexander mikadlit og 32 puntos sa dihang ang Oklahoma City Thunder mipildi sa San Antonio Spurs, 127-114, aron pagpaduol ngadto sa usa na lang ka daog aron moabante og balik sa NBA Finals kagahapong adlawa didto sa Paycom Center sa OKC.
Bitbit ang 3-2 nga labaw sa Western Conference finals, mahimo nang tapuson sa Thunder ang best-of-seven series sa Game 6 karong Biyernes apan angayan silang mangandam alang sa usa ka dakong gubat kay adto man kini duwaon sa korte sa Spurs.
Ang Canadian nga back-to-back MVP usa lamang sa lima ka players sa OKC nga mibirada og double figures.
Si Alex Caruso miposa og upat ka 3-pointers sa iyang 22 puntos, si Jared McCain mitimbre og 20 puntos samtang sila si Chet Holmgren ug Isaiah Hartenstein parehong miposte og double-double.
Si Caruso mibubo og 16 puntos ug 11 ka rebounds samtang si Hartenstein mihipos og 12 puntos ug 15 ka rebounds alang sa Thunder, nga sa usa ka higayon miabante og 20 puntos sa ikatulong kuwarter.
Ang bitoon sa Spurs nga si Victor Wembanyama nakapuntos man tuod og 20 apan mipasud lamang og upat sa 15 niya ka itsa. Namugnaw sab si Devin Vassell nga mi-iskor lamang og sayes puntos human mi-average og 17 puntos sa nag-unang upat ka duwa sa serye.