Heat, Grizzlies sud sa playoffs

CEBU, Philippines —  Ang Miami Heat ug ang Memphis Grizzlies maoy miangkon sa katapusang duha ka luna sa NBA playoffs.

Si Tyler Herro mipabuto og 30 puntos sa dihang gitagak sa Heat ang Atlanta Hawks, 123-114, sud sa overtime sa tinagakay nilang Eastern Conference play-in kagahapong adlawa didto sa State Farm Arena sa Atlanta, Georgia.

Ang Heat nahimong labing unang No.10 seed nga nakaabot sa playoffs pinaagi sa play-in.

Bukid pa hinoon ang tungason sunod sa Heat gumikan kay ang East top seed Cleveland Cavaliers mao may ilang makasangka sa unang hugna sa playoffs.

Ang Heat nakalabaw og 17 puntos sa first half apan ang Grizzlies sa hinayhinay nakagukod hangtud nga nakapuwersa sila og overtime luyo sa layup ni Trae Young sa nahibilin nga usa ka segundo sa regulasyon.

Sa dugang singko minutos sa aksiyon, sila si Herro ug Davion Mitchell mibomba og lima ka 3-pointers aron astawon ang Heat.

"Two competitive teams, fighting for the last spot in the playoffs. That was exactly what you saw. Both teams were deserving. I loved how my team fought," matud pa ni Herro. "Every single run that they made, we answered. And I feel like this entire season has really built us up for this point."

Ang Cavs inilog hinoon kaayo batok sa Heat sa ilang best-of-seven series nga mosikad didto sa Cleveland karong Lunes.

Si Young mitali og 29 puntos samtang si Onyeka Okongwu mihipos og 28 puntos ug 12 ka rebounds sa nanamilit nang Hawks.

Sa Western Conference, gilabni sa Grizzlies ang katapusang puwesto sa playoffs human gipabakasyon ang Dallas Mavericks, 120-106.

Bisan og adunay gipamati sa iyang tiil, si Ja Morant nakamaneho pag-iskor og 22 puntos ug siyam ka assists alang sa Grizzlies, nga makigharong batok sa No.1 seed Oklahoma City Thunder sa unang hugna.

Ang Grizzlies wala na molingi pa sukad sila miabante og 15 puntos sa unang kuwarter.

Alang sa Dallas, ang ilang kapildihan nagtuldok sa miserable nilang season nga naglangkob sa pagbiya sa bitoon nilang sa Luka Doncic ngadto sa Los Angeles Lakers.

Si Anthony Davis, nga napunta Dallas hulip ni Doncic sa labing kontrobersiyal nga trade sa kasaysayan sa NBA, gihatagan og medikal nga atensiyon tibuok duwa alang sa iyang mga angol apan maoy nangu sa natagak nang Mavs uban ang 40 puntos ug siyam ka rebounds.