Fajardo hayag ang tsansa nga moinat sa iyang record

CEBU, Philippines — Ang garbo sa Sugbo nga si June Mar Fajardo sa San Miguel Beer dako og puruhan nga moinat sa iyang rekord ngadto sa 12 ka Best Player of the Conference (BPC) awards sa PBA.

Human sa eliminasyon sa Season 49 Philippine Cup, si Fajardo maoy nag-una sa karera pagka-BPC diin nagsunod ang teammate niyang si CJ Perez, Robert Bolick sa NLEX ug Zav Lucero sa Magnolia.

Ang "The Kraken" gikan sa lungsod sa Pinamungajan mirehistro og average nga 40.4 statistical points gikan sa iyang 17.5 puntos, 13.1 rebounds ug 3.3 assists matag duwa.

Si Fajardo naglaraw sa ikaduha niyang BPC ning season human niya giisa sa ang tropeyo niadtong Governors' Cup.

Nagsunod kaniya si Perez nga adunay 38.5 SPsgikan sa iyang 23.4 puntos, 4.9 rebounds, 4.3 assists ug 1.8 steals.

Si Bolick, nga mi-average og 18.3 puntos, 6.7 rebounds ug 7.2 assists, nahimutang sa ikatulong dapit uban ang 37.6 SPs. Misikit kaniya si Lucero uban ang 37.3 SPs gikan sa average niining 18.9 puntos, 8.0 rebounds, 1.9 assists, 1.0 steal ug 1.5 block.

Ang forward sa Phoenix nga si Jason Perkins naa sa ikalimang puwesto uban ang 35.5 SPs.

Naglangkob sa Top 10 sila si Calvin Oftana sa TNT (35.4 SPs), ang kaluhang tore sa Converge nga sila si Justin Arana (34.6 SPs) ug Justine Baltazar (34.6 SPs), Japeth Aguilar sa Ginebra (34.2) ug Joshua Munzon sa NorthPort (32.3 SPs).