Celtics, Lakers parehongnahagba
CEBU, Philippines — Si Pascal Siakam milansang og krusyal nga 3-pointer sa nahibilin nga 7.3 segundos sa overtime aron aswaton ang Indiana Pacers ngadto sa makapakurat nga pagbihag sa kanhi way pildeng defending champion nga Boston Celtics, 135-132, sa NBA kagahapong adlawa didto sa Gainbridge Fieldhouse sa Indianapolis, Indiana.
Ang bayani nga si Siakam mipupo og 29 puntos alang sa Pacers, samtang si Bennedict Mathurin mipabuto og 30 puntos uban ang 11 ka rebounds.
Dako sab og naambag sa Cetlics si Tyrese Haliburton nga mihipos og 17 puntos ug 12 ka assists.
Si Jayson Tatum maoy nangu sa Celtics uban ang 37 puntos, samtang sila si Jalen Brown ug Derrick White nagkumboya'g 48 puntos apan way nahimo kay ang Celtics naparot sa unang higayon.
Tungod sa kadaogan sa Pacers, ang Cleveland Cavaliers mao na lang karon ang way pildeng team sa Eastern Conference.
Ang Cavs miinat sa perpekto nilang rekord ngadto sa 5-0 human gilampaso ang Los Angeles Lakers, 134-110.
Si Evan Mobley mi-iskor og 25 puntos samtang si Donovan Mitchell midugang og 24 puntos alang sa Cavs.
Si LeBron James mikadlit og 26 puntos samtang si Anthony Davis mikimada og 22 puntos ug 13 ka rebounds apan parehong nangahoyhoy ang ilang abaga gumikan kay ang Lakers nakatilaw sa ikaduha nilang sunod-sunod nga pilde.
- Latest
