CEBU, Philippines — Ang two-time defending champion University of the Visayas (UV) Green Lancers milusad sa ilang kampanya nga maka-Grand Slam pinaagi sa 78-71 nga pagpakaging sa University of San Jose-Recoletos (USJ-R) Jaguars sa Cebu Schools Athletic Foundation, Inc. (CESAFI) Season 24 basketball tournament niadtong Domingo, Septiyembre 22, diha sa Cebu Coliseum.
Si Raul Gentallan maoy nangu sa Lancers uban ang 15 puntos, lima ka rebounds ug duha ka assists. Ang reigning MVP nga si Kent Ivo Salarda mirehistro og double-double nga 14 puntos ug 10 ka rebounds samtang si team captain Jimpaul Amistoso midugang og 11 puntos, unom ka rebounds, upat ka assists ug upat ka steals.
Wala sab magpabitin si Ivan Clark Alsola nga mitampo og 10 puntos, lima ka rebounds, usa ka asssist ug usa ka steal alang sa Lancers, nga kontrolado kaayo ang duwa sukad sila mibulhot ngadto sa 18 puntos nga labaw, 24-6, sa naghinapos nga bahin sa unang kuwarter.
Ang Jaguars madasigong miresbak hinungdan nga nakasikit sa iskor nga 53-60 luyo sa gipabuto nilang 9-0 run sa hilimatyong segundos sa ikatulong kuwarter apan ang Lancers mipakita og igong katakos sa katapusang bahin sa duwa dayon na ngadto sa pagkab-ot og siyete puntos nga kadaogan.
Si Elmer Echavez maoy nangu sa Jaguars bitbit ang 19 puntos, 12 ka rebounds ug tulo ka assists. Sila si Ehman Suarez, Felvic Dorado, ug El John Lacaya mitali og 11 puntos matag usa apan nakawang ang ilang paningkamot.
Duna hinoon gihapoy angayan nga ikalipay ang USJ-R gumikan kay ang Baby Jaguars milampornas sa University of San Carlos (USC) Baby Warriors, 82-60, sa high school division.
Si J Lord Pepito misidlak nga labing hayag sa Baby Jaguars human mipupo og 12 puntos ug 12 sab ka rebounds. Nakakuha siya og igong suporta gikan nilang Jan Mark Toring ug Jan Vince Oringo nga nagkumbinar og 20 puntos, 14 ka rebounds, ug lima ka assists.
Sa laing resulta, ang University of Cebu Lapu-Lapu and Mandaue (UCLM) mirabaw sa debut sa Benedicto College Baby Cheetahs pinaagi sa 77-53 nga demolisyon.
Si Wade Adam Luche miharos og 15 puntos, walo ka rebounds ug tulo ka steals alang sa UCLM samtang sila si Prince Mallorca ug Jhon Jorvy Rodelis parehong midonar og 14 puntos.