Sac-SMB Awards mga bitoon sa cebu sports pasidunggan karong adlawa ---Emmanuel B. Villaruel

Ang mga bangiitang atleta ug tinamod nga personalidad sa kalibutan sa paugnat sa kusog maoy masentro sa atraksiyon sa gikahinaman nga 38th Sportswriters Association of Cebu-San Miguel Beer (SAC-SMB) Cebu Sports Awards nga ipahigayon na karong adlawa (Dominggo, Mayo 26) didto sa The Terraces sa Ayala Center Cebu.

Sugdan sa alas-4 sa hapon, ang espesyal nga kalihukan mohatag og rekognasyon niadtong mga nakahimo og kasikas sa Cebu sports sa miaging duha ka tuig.

Lakip sa mga pasidunggan mao ang notadong sports doctor nga si Dr. Rhoel Dejano ug ang kugihang public servant nga si Edward Hayco.

Si Dejano modawat sa Rico Navarrro Trophy isip Sportsman of the Year, samtang si Hayco, nga kasamtangang Philippine Sports Commissioner, hatagan sa Presidential Award.

Mokatkat sab sa bantawan ang upat ka mga ORLACSAN awardees nga sila si Jeff Codera, Jerry Maratas, Jeah Gacang, ug Jessica Honoridez. Ibayaw sila sa altar sa kadungganan tungod sa ilang dedikasyon ug maayong buhat ilabi na sa paghatag og kinabuhi ingon man paglaum sa mga atleta taliwala sa kalisdahan niadtong panahon pandemiya.

Ang SAC monutol sab og Posthumous Awards sa lima ka sportsmen nga mitaliwan na ngadto sa laing kalibutan apan nagbilin og legasiya nga dili mahikalimtan sa kadaghanan.

Kini mao sila si Enrico David "Rico" S. Navarro, Atty. George P. Bragat Sr., Dionisio "Diony" Cañete,  Ricky Ballesteros, ug Rafael "Raffy" Uytiepo.

Mokuha sab og atensiyon sa mahinungdanong okasyon ang 19 ka major awardees.

Kini naglangkob nilang June Mar Fajardo (basketball), Melvin “Gringo” Jerusalem (boxing), Margielyn Didal (skateboarding), Trixie Lofranco (arnis), Maria Ella Alcoseba (arnis), Dexler Bolambao (arnis), Rubilen Amit (billiards), Junia Gabasa (golf), Angelo Marquez (dancesport), Polaris Esports (Esport), Eliecha Zoey Malilay (jiu-jitsu), Ellise Xoe Malilay (jiu-jitsu), Angel Sanchez (jiujitsu), William John Riley Go (karting), Margielyn Didal (skateboarding), Aidaine Krishia Laxa (taekwondo), Matthew Justine Hermosa (triathlon) Elreen Ando (weightlifting), ug Ronil Tubog (wrestling). Dugang niini, miabot ngadto sa 142 ka mga atleta ug teams ang hatagan og special citations atol sa seremonyas, timaan sa pagka-abunda sa Sugbo og mga talento sa natad sa sports.