Paradero mi-KO ni Malupangue sa "Bakbakan sa Masbate"

CEBU, Philippines — Si kanhi world title challenger Robert "Super Inggo" Paradero mipakgang sa pito ka away niyang malas nga milanat og tulo ka tuig human iyang gi-knockout si Charlie Pizon Malupangue atol sa malampuson nga labing unang edisyon sa "Bakbakan sa Masbate" boxing series nga gi-presenta sa ATK Promotions ni Masbate Governor Antonio Kho niadtong Sabado sa gabii didto sa Cataingan Sports Center sa Cataingan, Masbate.

Ag 27-anyos nga si Paradero way kasudlan sa iyang kalipay ug hapit makahilak human nakakulit na gyud siya og daog human mapilde pinaagi sa split decision batok  sa kababayan niyang si Vic "Vicious" Saludar sa ilang World Boxing Association (WBA) minimumweight championship bout niadtong Pebrero 2021 didto sa Binan City, Laguna.

"Masayang-masaya ako na nanalo ulit at naibalik ang kompiyansa ko sa aking sarili," matud pa ni Paradero human giinat ang iyang rekord ngadto sa 18-7-2 nga gidayan-dayan na karon og 13KOs.

"Salamat sa lahat ng mga Masbateno lalong-lalo na kay Governor Antonio Kho sa oportunidad na ibinigay nila sa akin," dugang pa sa garbo sa Malaybalay, Bukdinon nga dunay kaliwat nga Sugboanon gikan sa lungsod sa San Fernando.

Sila si Paradero ug Malupangue nagsinukliay og mahait nga mga kinuno gikan sa sinugdanan.

Apan si Paradero sa kalit lang mipatupa og makusog nga suntok sa tiyan nga diha-diha nakapaluhod ni Malupangue samtang nagping-it sa kasakit.

Si Malupangue wala na makabarog pa sa dihang giiphan sa reperi hinungdan nga giundang ang away sa nahibilin nga usa ka segundo sa ikaupat nga hugna.

"Sana tuloy-tuloy na 'to kasi pangarap ko talagang magiging world champion balang araw," dason pa ni Paradero.

Sa supporting main event sa makasaysayanong promosyon nga gipaluyohan sa Kho Shipping Lines, si Sherwin Dacullo sa Noy Pacing Flores Gym sa dakbayan sa Mandaue miposte og impresibong unanimous decision nga kadaogan batok ni Sandre Paderan sa napuno sa aksiyon nilang rematch nga nakalingaw og maayo sa bagang panon sa mga nanan-aw.

Mismo si Governo Kho ang nahimuot sa huego todo nga kumbati nilang Dacullo ug Paderan hinungdan nga mihatag siya og P5,000 nga insentibo matag usa kanila.

Sa ubang mga sangka, si Yuli Hindoy milupig ni Jerry Tabago pinaagi sa split decision, samtang si Datu Adam mipatikangkang ni Christian Salazar sa oras nga 1:17 sa ikaduhang hugna.