House and lot na sab alang sa maka-gold sa Paris

CEBU, Philippines — Si Philippine Olympic Committee (POC) President Abraham "Bambol" Tolentino midalit na sab og makadani nga insentibo alang sa mga Pinoyng atleta nga mopakita'g aksiyon sa giatngan nga 2024 Paris Olympics karong Hulyo didto sa France.

Sama sa iyang gibuhat sa miaging 2020 Tokyo Olympics, si Tolentino mohatag og house and lot sa matag gold medal nga madaog sa usa ka Pinoy sa prestihiyosong torneyo nga mahitabo kausa lamang sud sa upat ka tuig.

“If I gave houses and lots to the medalists in the Tokyo Olympics, why can’t and won’t do it again for Paris,” matud pa ni Tolentino nga mao sab ang mayor sa Tagaytay City.

Tulo ka tuig ang milabay, si Tolentino miregalo og balay ug yuta nilang weightlifter Hidilyn Diaz-Naranjo nga naka-gold ug boxers Nesthy Petecio ug Carlo Paalam nga naka-silver sa Tokyo Games. Apan tungod kay nalipay sa gidaghanon sa mga atleta nga nakamedalya sa Tokyo, giapilan sab og hatag ni Tolentino si boxing bronze medalist Eumir Felix Marcial og house and lot.

“Our gold medalist, one or more, in Paris fully deserves this reward for their hard work, dedication and love for sport and country,” dason pa ni Tolentino.