Wemby nasilotan sa unang higayon
CEBU, Philippines — Ang superstar rookie sa San Antonio Spurs nga si Victor Wembanyama nakatilaw og silot sa labing unang higayon sa iyang karera.
Kini human ang NBA mipahamtang og $25,000 nga multa batok ni Wembanyama tungod sa paglabay niini sa bola ngadto sa mga fans human sa kulbahinam ug makutas nga kadaogan sa Spurs batok sa New York Knicks sud sa overtime niadtong Sabado.
Si Wembanyama miharos og 40 puntos ug milangkat og 20 ka rebounds sa dalaygong salida nga nakatabang sa Spurs pagsugakod sa gipabutong career-high 61 puntos ni Knicks All-Star Jalen Brunson.
Ang 20-anyos nga si Wembanyama milabni og krusyal nga steal sa hilimatyong segundos sa duwa aron silyohan ang daog sa Spurs.
Agi'g selebrasyon, gigakos niya kadiyot ang bola sa wala pa kini gilabay ngadto sa mga fans didto sa Frost Bank Center sa San Antonio, Texas.
Nindot man tuod ang intensiyon ni Wembanyama apan ang iyang gibuhat usa ka kalapasan sa mga lagda sa NBA nga nagdili sa paglabay o pagpatid sa bola ngadto sa mga fans hinungdan nga sila nasilotan.
- Latest
