CEBU, Philippines — Ang University of the Visayas (UV) Baby Lancers munasginhawang nakasud sa Final Four sa juniors division sa bag-ohay pang natapos nga 23rd Cebu Schools Athletic Foundation, Inc. (CESAFI) basketball season.
Salamat sa winner-over-the-other rule, nakaiyas sila sa 7-3 nga panagtabala uban sa University of Cebu (UC) Baby Webmasters aron birahon ang ikaupat ug katapusang luna sa semifinals.
Human niini, laing bukid na sab sag ang ilang tungason.
Kini tungod kay gikinahanglan nilang pildihon ang top seeded University of San Jose-Recoletos (USJ-R) Baby Jaguars duha ka higayon aron sila mo-abante sa finals. Ila kining nahimo.
Ang Baby Lancers misilyo sa duha ka duwa nilang pagpatikalbong sa Baby Jaguars aron pag-angkon og katungod nga maoy mohagit sa defending champion Sacred Heart Heart-School Ateneo de Cebu (SHS-AdC) Magis Eagles.
Mao kadto ang una nilang panag-abot sa finals sukad niadtong 2017. Ang mga batos ni coach Ronald "Magic" Bucao mipaduol pa gani ngadto sa usa na lang ka daog aron kumpletohon ang dalaygon nilang salida sa dihang ilang gipakuratan ang Magis Eagles sa pasiunang duwa sa ilang best-of-three series. Apan ang Magis Eagles madasigon kaayong miresbak hinungdan nga ilang gipakukapa ang Baby Lancers sa sunod nga duha ka duwa nga ilang gituldokan pinaagi sa kulbahinam nga daog sa tinagakay nga Game 3, 58-55, aron pagpabilin sa ilang trono.
Bisan pa man niini, si Bucao mapasigarbuhon gihapon kaayo sa Baby Lancers tungod sa sobra nilang nakab-ot nga wala nila damha ning season.
"This season makaingon ko nga it was a roller-coaster ride for us. Fourth seed mi nga nisulod sa semis unya gipilde namo ang twice-to-beat nga top seed," matud pa ni Bucao. "Nobody expected the Baby Lancers nga makasulod sa finals. Mao nang proud kaayo ko sa mga bata sa gipakita nila nga heart, resiliency ug never-say-die attitude."
"Ang mga bata willing mo-sacrifice sa ilang kaugalingon para makahatag og dungog sa ilang alma mater. Mao nay usa nga naa nila nga lisod nimu makit-an sa uban. Gagmay tuod pero dako kaayo sila og kasing-kasing manuwa," panapos pa ni Bucao.